Zrugg zu April bis Juni oder füre zu Oktober bis Dezember.

Fäbe isch ä id Schwiiz cho und zämme hemmer so viel Mänsche wie mögli troffe <3

Dä Fäbe in SF am Schaffe und d'Jasi ih de CH am lärne, viel z'brichte gits nöd... Updates folged :)

Ouuu, viel erläbt! Mit de Dési und em Fäbe vo SF über Napa uf Lake Tahoe und denn vo Redding uus in Lassen Volcanic National Park.

Haha, oh help! Mir hend am Fritignami wiedermal es paar Sache glernt; Thrifty am Fritignami am Flughafe isch HORROR! Churz nachem 3 simmer bi eus dehei los zum an Flughafe go s Auto hole, womer abem 4i buecht händ, zuegäh, mir hend s günstigst Auto buecht (Spar-🦊). Ih de Stadt hemmers nöd gholt, will mers det bisam 3 am Sunntignami wieder muss zruggäh und mir möchted vom Sunntig äno öppis haa. E riiiise Schlange bide Autovermietig Thrifty - aber nume bi ihne; Budget, Alamo, Hertz und was susch no alles so git fast kei Lüüt😂 Öppis anders als aahstah isch nöd in Frag cho…

90 Min spöter, am halbi 6i simmer am Schalter gstande und de Dude het gseit eusi Autoklass gits nüm, ussert mer warted 2h!!!, es hegi aber logischerwiis no tüüreri Autos für entweder 50 oder 75 $ meh pro Tag. Mir hend gfunde das chas ja nöd sii, und hend ahfah diskutiere… wo de Fäbe gseit het er segi vo daa, denn heter gfunde erl uegi waser chan mache und het eus denn für kein wiitere Uufpriis es Elektroauto ahbotte. De Hagge debii; Lade gächi 3h und wenn mers nöd vollgöade wett zruggbringe, chostets halt noma 35$… hämmer halt buecht und sind zum Auto. En Elektro-Kia. Koffere ihglade und startklar s‘Auto ihgschalte; 77% glade; 230 Meile chömemer mit dem, 200 Meile isch euses Ziel entfernt, SUPER! 

Isch eus chli en z‘heisse, drum simmer zum Schalter ih de Garage und hend s Auto zruggbracht und gseit mer wend es Benzin Auto. De Typ det isch denn nett gsi und hets eus umbuecht uf en Benziner womer nöd münd volltankt zruggäh. Aso simmer fängs am 6i zum Flughafe uusgfahre, und vlt so 5 min ohni Stau, denn simmer gfange gsii im Stadtchaos für wiiteri einehalb Stund😊

Am 20ab 11i ih de Nacht simmer ahchoo,  dur das, dasses aber so warm gsi isch duss, ischs igendwie nu halb so schlimm gsi :)

Zum de Samstig voll usnütze simmer früh use und hend e chliini Wanderig gmacht zum Grass Lake. De Parkplatz vor dem Wandergebiet isch am Morge am 9i scho pumpevoll gsi und mer hend eus gfasst gmacht uf viel Mänsche - ussert so en "Freiwillige" isch eus aber niemert entgägecho bim ufelaufe und mir hend de See und all Schmetterling für eus gha! Ufem Zruggweg hets denn chli anderst usgseh und es sind eus so Lüüt entgägegloffe, womer eus nöd sicher gsi sind, wie sie die 3 Wasserüberqueerige ohni nassi Schueh überstönd :P Nach 2ehalb Stund simmer wiiter at Meeks Bay, das isch die Beach mitem blauste Wasser vom Lake Tahoe (wo übrigensso klar isch wie sit 40 Jahr nüm). Das schöne blaue Wasser isch sehr beliebt ame Samstig Namittag, was nöd witer verwunderlich isch. Zudem isch grad no so es Fest gsi vo de Ihheimische Völker vom Lake Tahoe, was sicher äno es paar Lüüt ahglockt het. 

Im Schatte hemmer picknickt und d'Wärmi vo öppe 30 Grad gnosse 🙂 Zrugg im Hotel hemmer mitem Gedanke gspielt no churz an Beach da ih de Stadt gah, eifach zum nomal schnell inejucke, isch erst 6i gsi. Also nomal s'Züg packt und ad Beach gloffe, nu zum feststelle, dases Ihtritt chost... nöd so 5-7 Franke wie ih de Schwizer Badis, nei, 25 Dollar pro Person 😂  tschüss!

Znacht go ässe und denn glii zrugg is Hotel, will d'Madame glaub chli viel Sunne gha het und Chopfweh mit müed sie is Bett zwunge het.

De Sunntig hemmer nomal so welle gstalte; aso uf, es churzi Wanderig und denn ad Nevada Beach. Det es Kayak gmietet und gsünnelet, bevor mer eus so am 3 uf de Heiweg gmacht hend. Ih eim Schnurz chönne fahre - super gange! Sehr es schöööns Wuchenend gsii☺️

1.7. Hike hinter Berkeley und Lake Anza, ufem Heiweg bi Halfmoon Bay Znacht gässe

2.7. Foggy in the City, drum simmer uf de Mount Diablo und am Abig di gstrandete Hiwiler troffe ufes Shuffleboard

3.7. Hike im Castle Rock State Park, ufem Heiweg en Halt gmacht ih Pacifica, im Costco und denn Tennis :-)

4.7. En Tag ih de Stadt, Znacht im berüehmte und anschinen beste Pizza Lade vo SF, und Höche Bsuech vo NY; Ding und Betty <3

7.7. De Eddie und d'Alyssa sind bi eus verbiicho :)

8.7. Baseball Spiel go luege ame wulchelose Samstignamittag

9.7. De grüeni Wäg gwählt vo eus im Glen Park bis zum Golden Gate Park und no en churze Stopp ihgleit im Inner Sunset Flohmärt, Museum California Academy of Science, wills näblig und eher frisch gsi isch :)